കോട്ടയം: ചായ ഉണ്ടാക്കാൻ ഗ്യാസ് അടുപ്പ് കത്തിക്കുന്നതിനിടെ അടുക്കളയിലുണ്ടായിരുന്ന മണ്ണെണ്ണക്കുപ്പിയിലേക്ക് തീപടർന്ന് പൊള്ളലേറ്റ യുവതി മരിച്ചു. കോട്ടയം കളത്തിപ്പടി പൊൻപള്ളി കൊച്ചുപറമ്പിൽ ജോസിെൻറ മകൾ ജീനയാണ് (അമ്മു -19) മരിച്ചത്. കാരിത്താസ് ആശുപത്രിയിലെ എൻഡോസ്കോപി വിദ്യാർഥിനിയാണ്. വ്യാഴാഴ്ച രാവിലെ 11ഓടെയായിരുന്നു സംഭവം. ഹോട്ടൽ ജീവനക്കാരനായ പിതാവ് ജോലിക്ക് പോയിരുന്നു. സഹോദരൻ ജിജിനും ഭാര്യ ചിന്നുവും വീട്ടിലുണ്ടായിരുന്നില്ല. ജീനയുടെ നിലവിളി കേട്ട് എത്തിയ അയൽവാസിയാണ് അടുക്കളയിൽ പൊള്ളലേറ്റ നിലയിൽ ജീനയെ കണ്ടത്.
ഉടൻ പൊലീസിനെയും അഗ്നിരക്ഷാസേനയെയും അറിയിച്ചു. 90 ശതമാനത്തിലേറെ പൊള്ളലേറ്റ യുവതിയെ മെഡിക്കൽ കോളജ് ആശുപത്രി അത്യാഹിത വിഭാഗത്തിൽ പ്രവേശിപ്പിച്ചെങ്കിലും രാത്രി ഒമ്പതോടെ മരിച്ചു. മാതാവ്: പരേതയായ ജയമോൾ.
