പാലാ: ഏറ്റുമാനൂര്-പൂഞ്ഞാര് ഹൈവേയില് ഇടപ്പാടി ജങ്ഷനുസമീപം കാറുകള് കൂട്ടിയിടിച്ച് വീട്ടമ്മ മരിച്ചു. ഒരാൾക്ക് പരിക്കേറ്റു. കായംകുളം രണ്ടാംകുറ്റി പാഞ്ചേരില് ഷാജിയുടെ ഭാര്യ ജയശ്രീയാണ് (48) മരിച്ചത്. കാറിൽ ഒപ്പമുണ്ടായിരുന്ന ബന്ധു ആശ വിജയനാണ് (36) പരിക്കേറ്റത്. ഞായറാഴ്ച വൈകീട്ട് നാലോടെയായിരുന്നു അപകടം. തീക്കോയി മേസ്തിരിപ്പടിയില് ജയശ്രീയും കുടുംബവും 15 വര്ഷമായി വാടകക്ക് താമസിക്കുകയാണ്. തീക്കോയിയില്നിന്ന് ചേര്പ്പുങ്കലിലെ സ്വകാര്യ ആശുപത്രിയിലേക്ക് പോകുംവഴി എതിര്ദിശയില് വന്ന കാറുമായാണ് കൂട്ടിയിടിച്ചത്. ബന്ധുവിന് കോവിഡ് സ്ഥിരീകരിച്ചതിനാല് ക്വാറൻറീനിലായിരുന്ന ജയശ്രീക്ക് ശാരീരികാസ്വാസ്ഥ്യം അനുഭവപ്പെട്ടതിനെത്തുടര്ന്നാണ് ആശയെയുംകൂട്ടി ആശുപത്രിയിലേക്ക് പുറപ്പെട്ടത്. അപകടത്തില് സാരമായി പരിക്കേറ്റ ജയശ്രീയെ കോട്ടയം മെഡിക്കല് കോളജ് ആശുപത്രിയില് പ്രവേശിപ്പിച്ചെങ്കിലും തിങ്കളാഴ്ച മരിക്കുകയായിരുന്നു. ഭര്ത്താവ് ഷാജി തൃപ്പൂണിത്തുറയിലെ ഹോട്ടല് ജീവനക്കാരനാണ്. മകള്: അലോണ. സംസ്കാരം ചൊവ്വാഴ്ച ഉച്ചകഴിഞ്ഞ് കായംകുളത്തെ വീട്ടുവളപ്പില്. മരണശേഷം നടത്തിയ പരിശോധയിൽ ജയശ്രീക്ക് കോവിഡ് സ്ഥിരീകരിച്ചതായി പൊലീസ് അറിയിച്ചു.