ചങ്ങനാശ്ശേരി: കണ്ടെയ്നർ ലോറിയും മിനി ലോറിയും കൂട്ടിയിടിച്ച് മകനൊപ്പം സഞ്ചരിച്ച ഗൃഹനാഥൻ മരിച്ചു. തൊടുപുഴ വേങ്ങല്ലൂർ കപ്രാട്ടിൽ വീട്ടിൽ മുഹമ്മദ് കണ്ണിെൻറ (കുഞ്ഞമ്മാണി അണ്ണൻ) മകൻ കെ.പി. ഷാജിയാണ് (55) മരിച്ചത്. പായിപ്പാട് നാലുകോടി ജങ്ഷനിൽ ഞായറാഴ്ച പുലർച്ച 3.50 ഓടെയാണ് സംഭവം.തൊടുപുഴയിൽനിന്ന് തടി ഉരുപ്പടികളുമായി തിരുവനന്തപുരത്തേക്ക് പോയ ഷാജിയും മകൻ ഷാമോനും സഞ്ചരിച്ച മിനി ലോറിയും പായിപ്പാട് മാർക്കറ്റിൽ മത്സ്യം ഇറക്കിയശേഷം തിരികെ വന്ന കണ്ടെയ്നർ ലോറിയും കൂട്ടിയിടിക്കുകയായിരുന്നു. ഷാജിയുടെ മകനായിരുന്നു മിനി ലോറി ഓടിച്ചത്. ഇടതുവശത്ത് ഇരുന്ന ഷാജിയുടെ ഭാഗത്താണ് കണ്ടെയ്നർ ലോറി ഇടിച്ചത്. ഇടിയുടെ ആഘാതത്തിൽ വാതിലിനടിയിൽ അകപ്പെട്ട ഷാജിയുടെ കാലിനുതാഴേക്ക് ഗുരുതര പരിക്കേറ്റു. കോട്ടയം മെഡിക്കൽ കോളജ് ആശുപത്രിയിലേക്ക് കൊണ്ടുപോകവെ മരിക്കുകയായിരുന്നു. ലോറി അമിതവേഗത്തിൽ എത്തിയതാകാം അപകടത്തിന് ഇടയാക്കിയതെന്ന് പൊലീസ് പറഞ്ഞു. തൃക്കൊടിത്താനം പൊലീസ് നടപടി സ്വീകരിച്ചു. അപകടത്തിൽ മിനി ലോറിയുടെ മുൻഭാഗം പൂർണമായും തകർന്നു. മൃതദേഹം കോട്ടയം മെഡിക്കൽ കോളജ് ആശുപത്രിയിൽ പോസ്റ്റ്മോർട്ടത്തിനുശേഷം ബന്ധുക്കൾക്ക് വിട്ടുനൽകി. ഞായറാഴ്ച വൈകീട്ട് അഞ്ചോടെ വേങ്ങല്ലൂർ വലിയവീട്ടിൽ പള്ളി ഖബർസ്ഥാനിൽ ഖബറടക്കം നടത്തി. മാതാവ്: സൈനബ. ഭാര്യ: അനീസ. മറ്റുമക്കൾ: സൽമാൻ, ഷബാന. മരുമക്കൾ: ഖദീജ, നസീദ്. സഹോദരങ്ങൾ: നവാസ്, നാസർ, നിഷാദ്, റെജീന, ബുഷറ, ഷാഹിറ.