ഈരാറ്റുപേട്ട: ജില്ലയിലെ ആദ്യകാല കമ്യൂണിസ്റ്റ് നേതാവും നിരവധി തൊഴിലാളി സംഘടനകളുടെ അമരക്കാരനും കല സാംസ്കാരിക രംഗത്തെ പ്രമുഖനുമായിരുന്ന കൈപ്പള്ളി ഇല്ലത്ത് കെ. വാസുദേവൻ നമ്പൂതിരി (കെ.വി കൈപ്പള്ളി -95) അന്തരിച്ചു. കൊണ്ടൂരിൽ കേശവൻ നമ്പൂതിരിയുടെയും സാവിത്രി അന്തർജനത്തിെൻറയും മകനാണ്. പ്രാഥമിക വിദ്യാഭ്യാസ കാലത്തുതന്നെ കഥകളി അഭ്യസിച്ച് നിരവധി വേദികളിൽ കഥകളി അവതരിപ്പിച്ചു. ദീർഘകാലം സി.പി.ഐ ജില്ല കൗൺസിൽ അംഗം, കിസാൻസഭ ജില്ല പ്രസിഡൻറ്, സംസ്ഥാന സെക്രട്ടേറിയറ്റ് അംഗം, മീനച്ചിൽ താലൂക്ക് ലാൻഡ് ബോർഡ് അംഗം, ആർ.ടി.ഒ ബോർഡ് അംഗം, അഗ്രോ ഇൻഡസ്ട്രീസ് കോർപറേഷൻ ബോർഡ് അംഗം എന്നീ സ്ഥാനങ്ങൾ വഹിച്ചു. നിലവിൽ മീനച്ചിൽ താലൂക്ക് ചെത്തു തൊഴിലാളി യൂനിയൻ പ്രസിഡൻറായിരുന്നു. സംസ്കാരം വെള്ളിയാഴ്ച വീട്ടുവളപ്പിൽ നടത്തി. ഭാര്യ: ചിറക്കടവ് കടൂപ്പറമ്പിൽ കുടുംബാംഗം സുമതിക്കുട്ടി. മക്കൾ: സുലോചന, സുകുമാരി, സുരേഷ് കുമാർ (മേൽശാന്തി മാങ്കടവ് ദേവീക്ഷേത്രം അടിമാലി), സുനിൽ കുമാർ (കിഴതടിയൂർ ബാങ്ക്, പാലാ). മരുമക്കൾ: നീലകണ്ഠശർമ കുറിച്ചി, ശശിധരൻ തലപ്പുലം, അമ്പിളി കുറിച്ചിത്താനം, അമ്പിളി അമ്പലപ്പുഴ.