പാലാ: നായ് കുറുകെ ചാടിയതിനെത്തുടർന്ന് നിയന്ത്രണം നഷ്ടപ്പെട്ട സ്കൂട്ടർ മറിഞ്ഞ് ഭർത്താവിനൊപ്പം യാത്ര ചെയ്ത എട്ടുമാസം ഗർഭിണിയായ നഴ്സ് മരിച്ചു. വെമ്പള്ളിക്ക് സമീപം കളത്തൂര് കളപ്പുരയ്ക്കല് (വെള്ളാരംകാലായില്) ബിജുവിെൻറ ഭാര്യ റിന്സമ്മ ജോണാണ് (40) മരിച്ചത്. പാലാ മാര് സ്ലീവാ മെഡ്സിറ്റിയിലെ സ്റ്റാഫ് നഴ്സായ റിൻസമ്മ ജോലിക്ക് പോകുംവഴി വെള്ളിയാഴ്ച രാവിലെ 6.45ഓടെ പാലാ-പൂഞ്ഞാര് ഹൈവേയില് ചേര്പ്പുങ്കലിലാണ് അപകടം സംഭവിച്ചത്. ബൈക്കിൽ പിന്നിലിരുന്ന റിന്സമ്മ റോഡില് വയറടിച്ച് വീണു. ഉടന് മാര് സ്ലീവാ മെഡ്സിറ്റിയില് ഇരുവരെയും പ്രവേശിപ്പിച്ചെങ്കിലും റിന്സമ്മയെയും ഗര്ഭസ്ഥ ശിശുവിനെയും രക്ഷപ്പെടുത്താൻ സാധിച്ചില്ല. പരിക്കേറ്റ ബിജുവും ചികിത്സയിലാണ്. എട്ടുവര്ഷം മുമ്പ് വിവാഹിതരായ ഇവര്ക്ക് കുട്ടികളില്ലായിരുന്നു. ദിവസവും റിന്സമ്മയെ ആശുപത്രിയില് കൊണ്ടുവിട്ടിരുന്നത് ബിജുവായിരുന്നു. കുര്യത്ത് ചിക്കന് സെൻറര് നടത്തുകയാണ് ബിജു. റിന്സമ്മയുടെ സംസ്കാരം ശനിയാഴ്ച വൈകീട്ട് മൂന്നിന് കളത്തൂര് സെൻറ് മേരീസ് പള്ളി സെമിത്തേരിയില്.