മണ്ണഞ്ചേരി: ലോറിയുടെ പിന്നിൽയാത്ര ചെയ്ത യുവാവ് ദേശീയപാതയിൽ വളവനാട് കോൾഗേറ്റ് ജങ്ഷനിൽ റോഡിലേക്ക് തെറിച്ചുവീണ് മരിച്ചു. തൃക്കുന്നപ്പുഴ പഞ്ചായത്ത് 17ാം വാർഡിൽ പല്ലന തൈവയ്പ്പിൽ വീട്ടിൽ പരേതനായ മണിയെൻറ മകൻ മനുവാണ് (37) മരിച്ചത്.
ഞായറാഴ്ച പുലർച്ച ഒന്നരയോടെയാണ് അപകടം. കോൺക്രീറ്റ് സ്ലാബ് നിർമാണത്തൊഴിലാളിയായ മനു പൊന്നാനിയിൽനിന്ന് ലോറിയിൽ മടങ്ങവേയാണ് അപകടമുണ്ടായത്. തൊഴിലുപകരണങ്ങൾ കയറ്റിയ ലോറിയുടെ പിന്നിലിരുന്ന് യാത്ര ചെയ്യുകയായിരുന്ന മനു തെറിച്ച് റോഡിലേക്ക് വീഴുകയായിരുന്നു. പിന്നാലെവന്ന കൊറിയർ സ്ഥാപനത്തിെൻറ ലോറിക്കടിയിൽ കുടുങ്ങി തൽക്ഷണം മരണം സംഭവിച്ചു. ആലപ്പുഴയിൽനിന്നെത്തിയ അഗ്നിരക്ഷാസേനാംഗങ്ങളാണ് ലോറിയുടെ ആക്സിലിനിടയിൽനിന്ന് മൃതദേഹം പുറത്തെടുത്തത്. അപകടം സംബന്ധിച്ച് വ്യക്തത വരുത്തുന്നതിന് സമീപത്തെ സ്വകാര്യ സ്ഥാപനത്തിെൻറ കാമറ ദൃശ്യങ്ങൾ പൊലീസ് പരിശോധിച്ചു. മനു സഞ്ചരിച്ച ലോറിയുടെ ഡ്രൈവർ അപകടം അറിഞ്ഞിരുന്നില്ല. തൃക്കുന്നപ്പുഴയിൽ എത്തിയശേഷമാണ് മനുവിനെ കാണാതായ വിവരം അറിഞ്ഞത്. മാതാവ്: വിമല. സഹോദരങ്ങൾ: സിനി, പരേതരായ മിനി, സുനിൽ.