പാലാ: പച്ചക്കറി കയറ്റിവന്ന ലോറി മറിഞ്ഞ് ഡ്രൈവർ മരിച്ചു. പാലാ- തൊടുപുഴ റൂട്ടിൽ പയപ്പാർ ജങ്ഷനിലെ വളവിൽ വെള്ളിയാഴ്ച പുലർച്ച 5.30ഓടെയാണ് അപകടം. ലോറി ഓടിച്ചിരുന്ന തലയോലപ്പറമ്പ് പൊതി പാലത്തിന് സമീപം നെല്ലാനപ്പള്ളികാലായിൽ എൻ.കെ. ശശിയുടെ മകൻ ഷൈനാണ് (27) മരിച്ചത്. ലോറിയിൽ ഒപ്പമുണ്ടായിരുന്ന ബിജുവിന് പരിക്കേറ്റു. ഇയാൾ കോട്ടയം മെഡിക്കൽ കോളജ് ആശുപത്രിയിൽ ചികിത്സയിലാണ്. തൊടുപുഴയിൽനിന്ന് പച്ചക്കറിയുമായി കാഞ്ഞിരപ്പള്ളിക്ക് പോവുകയായിരുന്നു ലോറി. പയപ്പാർ ഇറക്കമിറങ്ങവേ വാഹനം നിയന്ത്രണംവിട്ട് വളവിൽ മറിയുകയായിരുന്നു. ഹൈവേയിലെ വെയ്റ്റിങ് ഷെഡ് തകർത്ത് മറിഞ്ഞ ലോറി ഭാഗികമായി തകർന്ന നിലയിലാണ്. അഗ്നിരക്ഷാസേനും പൊലീസും ചേർന്ന് വാഹനം വെട്ടിപ്പൊളിച്ചാണ് അപകടത്തിൽപെട്ടവരെ പുറത്തെടുത്തത്. ഷൈെൻറ മൃതദേഹം പാലാ ജനറൽ ആശുപത്രിയിൽ എത്തിച്ച് പൊലീസ് നടപടി പൂർത്തിയാക്കി ബന്ധുക്കൾക്ക് വിട്ടു നൽകി. മാതാവ്: ഓമന. സഹോദരങ്ങൾ: ശരത്ത്, ശരണ്യ. ആഴ്ചകൾക്ക് മുമ്പും ഇതേ സ്ഥലത്ത് ലോറി തലകീഴായി മറിഞ്ഞ് അപകടമുണ്ടായിരുന്നു.