റാന്നി: പെരുന്തേനരുവി ഡാമിന് സമീപത്ത് ഒഴുക്കിൽപെട്ട യുവാവിെൻറ മൃതദേഹം കണ്ടെത്തി. തിങ്കളാഴ്ച പുലർച്ച അഞ്ചേകാലോടെയാണ് മൃതദേഹം കണ്ടത്. പൊൻകുന്നം ചിറക്കടവ് തുറുവാതുക്കൾ വീട്ടിൽ സാജെൻറ മകൻ എബിയുടെ (22) മൃതദേഹമാണ് കണ്ടെത്തിയത്. മൂന്ന് ദിവസമായി തിരച്ചിൽ നടത്തിവരുകയായിരുന്നു. ഒഴുക്കിെൻറ ശക്തിയിൽ പാറയിടുക്കിൽ തങ്ങിനിന്ന മൃതശരീരം ഉയർന്നുവരുകയായിരുന്നെന്ന് കരുതുന്നു. സംഭവസ്ഥലത്ത് എൻ.ഡി.ആർ.എഫ് സംഘവും അഗ്നിരക്ഷാസേനയും തങ്ങുന്നുണ്ടായിരുന്നു. കുടുംബത്തോടൊപ്പം പെരുന്തേനരുവി വെള്ളച്ചാട്ടം കാണാൻ വന്നതായിരുന്നു. ആറംഗ സംഘത്തിൽപെട്ട എബി വെള്ളിയാഴ്ച വൈകീട്ട് 6.20 ഓടെയാണ് ഒഴുക്കിൽപെട്ടത്. ഫോട്ടോ എടുക്കുന്നതിനിടെ കാൽവഴുതി വീഴുകയായിരുന്നെന്ന് പറയുന്നു. പിതാവ്: സാജൻ. മാതാവ്: ബിനി സാജൻ.