ഇലാഹിനൊരു തുറന്ന കത്ത്

ഒ​ന്ന്

ക​ഥ​യെ​ഴു​തു​ന്ന​വ​ർ​ക്ക് എ​ഴു​താ​ൻ കി​ട്ടു​ന്ന അ​വ​സ​ര​ങ്ങ​ളാ​ണ​ത്രെ ജീ​വി​ത​ത്തി​ലെ ഓ​രോ​രോ പ്ര​ശ്ന​ങ്ങ​ളും തു​ട​ർ​ന്നു​ള്ള മ​ന​സ്സി​ലെ അ​സ്വ​സ്ഥ​ത​ക​ളും ന​ൽ​കു​ന്ന​തെ​ന്ന് ഒ​രു സു​ഹൃ​ത്ത് ഒ​രി​ക്ക​ൽ പ​റ​ഞ്ഞി​ട്ടു​ണ്ട്. പ​ല​പ്പോ​ഴും അ​വ അ​ഭി​മു​ഖീ​ക​രി​ക്കു​മ്പോ​ഴൊ​ക്കെ എ​ത്ര​യോ ത​വ​ണ ചി​ന്തി​ച്ച് സൃ​ഷ്ടി​ക​ൾ മ​ന​സ്സി​ൽ കൊ​ത്തി​യെ​ടു​ത്തി​ട്ടു​ണ്ടെ​ന്നോ. അ​തൊ​രു അ​ക്ഷ​ര​ക്കൂ​ട്ട​മാ​യി ഒ​രു ക​ട​ലാ​സ് ക​ഷ​ണ​ത്തി​ൽ ഉ​രു​ട്ടി എ​ഴു​തു​മ്പോ​ഴൊ​ക്കെ മ​ന​സ്സി​ൽ ത​ളം​കെ​ട്ടി കി​ട​ന്ന എ​ല്ലാ പ​രി​ഭ​വ​ങ്ങ​ളും യാ​ത​ന​ക​ളും അ​ക്ഷ​ര​ങ്ങ​ളെ വ​ലം​വെ​ച്ച് മൗ​നം​തൂ​ങ്ങി ഉ​റ​ങ്ങു​ന്ന​തും അ​നു​ഭ​വ​പ്പെ​ട്ടു. അ​വ​ർ​ക്ക് ഒ​രു പു​ന​ർ​ജ​ന്മം ന​ൽ​കാ​ൻ വാ​യ​ന​ക്കാ​ർ​ക്ക് മാ​ത്ര​മേ സാ​ധി​ക്കൂ.

എ​ന്റെ ചി​ന്ത​ക​ൾ ഒ​ന്നി​ൽ​നി​ന്ന് മ​റ്റൊ​ന്നി​ലേ​ക്കി​ങ്ങ​നെ കു​തി​ച്ചു​കൊ​ണ്ടി​രു​ന്നു. കി​ട​ക്ക​യി​ൽ​നി​ന്നെ​ണീ​റ്റ് അ​ലോ​സ​ര​മാ​യി കി​ട​ന്ന മേ​ശ​യി​ൽ​നി​ന്നും ഒ​രു പേ​പ്പ​ർ എ​ടു​ത്ത് എ​ഴു​താ​ൻ തു​ട​ങ്ങി. നേ​രം വെ​ളു​ക്കാ​ൻ ഇ​നി​യും ബാ​ക്കി. ജ​നാ​ല​ക​ൾ ആ​ഞ്ഞ​ടി​ച്ച് ശ​ബ്ദം ഉ​ണ്ടാ​ക്കു​ന്നു​ണ്ട്. ചി​ല​പ്പോ​ഴൊ​ക്കെ ചി​ന്ത​ക​ൾ ഉ​റ​ക്ക​ത്തെ കെ​ടു​ത്തും, ഉ​റ​ക്ക​മി​ല്ലാ​യ്മ സ​മാ​ധാ​ന​ത്തെ കെ​ടു​ത്തും. ഒ​രു ഭ​യം, എ​ന്തെ​ന്നി​ല്ലാ​ത്ത ഭ​യം. ഇ​ത് ആ​രെ​ങ്കി​ലും വാ​യി​ച്ചാ​ലോ? ഇ​ല്ല ആ​ർ​ക്കും വാ​യി​ക്കാ​ൻ കൊ​ടു​ക്കി​ല്ല. ഇ​തെ​നി​ക്ക് വേ​ണ്ടി ഞാ​ൻ എ​ഴു​തു​ന്ന​താ​ണ്.

ഇ​ലാ​ഹി​നാ​യി ഒ​രു തു​റ​ന്ന ക​ത്ത്...

എ​ന്നെ​പ്പോ​ലെ എ​ത്ര പേ​ർ ക​ത്തെ​ഴു​തി​യി​ട്ടു​ണ്ടാ​ക​ണം, അ​റി​യി​ല്ല. പ​ക്ഷേ, ചി​ല​ർ തു​ട​ര​ത്തു​ട​രെ ക​ത്തെ​ഴു​തി​ക്കൊ​ണ്ടി​രി​ക്കു​ക​യാ​ണ്, വി​ശ്ര​മ​മി​ല്ലാ​തെ.

പി​ന്നീ​ട് ബോ​ധം വീ​ണ​പ്പോ​ൾ ഇ​ട​ക്ക് ഉ​റ​ങ്ങി​പ്പോ​യി എ​ന്ന് മ​ന​സ്സി​ലാ​യി. കി​ട​ക്ക​യി​ൽ കി​ട​ന്നു​കൊ​ണ്ട് ക്ലോ​ക്കി​ലേ​ക്ക് നോ​ക്കി. കാ​ഴ്ച മ​ങ്ങി​യി​രി​ക്കു​ന്നു. എ​ന്നാ​ലും സു​ബ്ഹി​ക്ക് സ​മ​യ​മാ​യെ​ന്ന് തൊ​ട്ട​ടു​ത്തു​ള്ള പ​ള്ളി​യി​ലെ ബാ​ങ്ക് എ​ന്നെ അ​റി​യി​ച്ചു. ശ​രീ​ര​മാ​കെ ത​ണു​ത്തി​രി​ക്കു​ന്നു. ഞെ​ര​ങ്ങി ഞെ​ര​ങ്ങി ക​ട്ടി​ലി​ൽ​നി​ന്ന് എ​ണീ​ക്കാ​ൻ ഒ​രു ശ്ര​മം ന​ട​ത്തി, ഫ​ലം ക​ണ്ടി​ല്ല. ക​ണ്ണു​ക​ളി​ലൂ​ടെ ഇ​രു​ട്ട് അ​രി​ച്ചു​ക​യ​റു​ന്നു, നെ​ഞ്ചി​ൻ​കൂ​ടി​നെ ശ​രീ​ര​ത്തി​ൽ​നി​ന്നും അ​റു​ക്കു​ന്നു, കൈ​കാ​ലു​ക​ൾ ച​ല​ന​ര​ഹി​ത​മാ​കു​ന്നു. എ​ല്ലാം ഒ​രു​മി​ച്ച​റി​ഞ്ഞു. ആ ​കൊ​ച്ചു​മു​റി​യി​ൽ ഞാ​ൻ ഒ​റ്റ​ക്ക​ല്ലെ​ന്ന് മ​ന​സ്സി​ലാ​യി. മ​റ്റാ​രു​ടെ​യൊ​ക്കെ​യോ സാ​ന്നി​ധ്യം അ​നു​ഭ​വി​ക്കാ​ൻ ക​ഴി​യു​ന്നു. ചു​റ്റു​പാ​ടി​ൽ​നി​ന്നും ശ​ബ്ദ​ങ്ങ​ൾ ഉ​യ​ർ​ന്നു. പി​റു​പി​റു​ക്ക​ൽ, ര​ഹ​സ്യ​ങ്ങ​ൾ... ഒ​ടു​വി​ൽ പൊ​ട്ടി​ക്ക​ര​ച്ചി​ൽ. ക​ത​ക് തു​റ​ന്നാ​രോ അ​ക​ത്തേ​ക്ക് പ്ര​വേ​ശി​ച്ചു.

‘‘ഇ​ന്ന് ഇ​ട​യ​ത്താ​ഴം ഇ​ല്ലാ​തെ​യാ​ണോ നോ​മ്പെ​ടു​ക്ക​ണ​ത്? അ​തും ഈ ...’’

​ബാ​നു​വി​ന്റെ ശ​ബ്ദ​മാ​യി​രു​ന്നു അ​ത്. അ​വ​ർ പൂ​ർ​ത്തി​യാ​ക്കാ​തെ അ​വി​ടെ നി​ന്നു.

‘‘ബാ​നു...’’

ബാ​നു പു​റ​ത്തേ​ക്ക് പോ​യി... കു​റ​ച്ച് ക​ഴി​ഞ്ഞ​പ്പോ​ൾ മ​ട​ങ്ങി​വ​ന്നു. എ​ന്തോ ക​ള​ഞ്ഞു​പോ​യ​തു​പോ​ലെ അ​വ​ർ അ​വി​ടെ പ​ര​തു​ന്നു​ണ്ട്.

‘‘എ​ന്താ ബാ​നു...’’

***

ര​ണ്ട്

‘‘പേ​രെ​ന്താ?’’

ചി​രി​യാ​യി​രു​ന്നു മ​റു​പ​ടി..

‘‘പേ​രി​ല്ലേ... അ​തോ മ​റ​ന്നു​പോ​യോ..?’’

‘‘ന്നെ ​ബാ​നു​ന്ന് വി​ളി​ച്ചോ​ളൂ...’’

ബാ​നു. വീ​ട്ടി​ൽ​നി​ന്ന് മാ​റി താ​മ​സി​ക്കേ​ണ്ടി വ​ന്ന​പ്പോ​ൾ ഞാ​ൻ നേ​രി​ട്ട സം​ഘ​ർ​ഷം മാ​റ്റി​യ ആ​ൾ. ബാ​നു​വി​ന് എ​ന്നി​ലും ഏ​റെ പ്രാ​യ​മു​ണ്ട്. അ​വ​രി​ലേ​ക്ക് ഞാ​ൻ ആ​ക​ർ​ഷി​ക്ക​പ്പെ​ട്ട​ത് ര​ണ്ട് കാ​ര​ണ​ത്താ​ലാ​യി​രു​ന്നു. ഒ​ന്ന്, അ​വ​ർ​ക്ക് സ്വ​ന്ത​മെ​ന്ന് പ​റ​യാ​ൻ ആ​രും ത​ന്നെ​യി​ല്ല. അ​തു​കൊ​ണ്ട് ത​ന്നെ വി​ഷ​മ​ങ്ങ​ൾ ഒ​രു ചി​രി​യി​ൽ ഒ​തു​ക്കാ​ൻ സ്വ​യം പ​ഠി​ച്ചു. ര​ണ്ട്, ബാ​നു ക​ഥ പ​റ​യു​മ്പോ​ൾ ഒ​രു ക​ഥാ​കാ​രി അ​വി​ടെ ജ​നി​ച്ചു​വീ​ഴു​ന്ന​താ​യി കാ​ണാം. ക​ഥ​ക​ൾ പ​റ​യു​മ്പോ​ൾ അ​തി​ലേ​ക്ക് ന​മ്മ​ളെ​യും കൂ​ടി കൈ​പി​ടി​ച്ച് ആ ​ക​ഥാ​പാ​ത്ര​ങ്ങ​ൾ ന​ട​ന്ന പാ​ത​യി​ലൂ​ടെ, അ​നു​ഭ​വി​ച്ച ദീ​ർ​ഘ​വേ​ദ​ന​ക​ളി​ലൂ​ടെ ക​ട​ന്നു​പോ​കാ​നും അ​വി​ടേ​ക്ക് കൊ​ണ്ടു​പോ​കാ​നും അ​വ​ർ​ക്ക് ക​ഴി​യും. അ​വ​ർ​ക്ക് കി​ട്ടി​യ​തൊ​രു ശ്രോ​താ​വി​നെ​യും എ​നി​ക്ക് കി​ട്ടി​യ​ത് ഒ​രു ആ​ത്മ​മി​ത്ര​ത്തി​നെ​യും.

ന​ല്ലൊ​രു മ​ന​സ്സു​ള്ള, ആ​ത്മാ​വി​ൽ തൊ​ട്ട​റി​യു​ന്ന സൗ​ഹൃ​ദ​ങ്ങ​ളി​ൽ ഒ​ന്നാ​യി ഞ​ങ്ങ​ളു​ടേ​ത്. എ​ന്റെ താ​മ​സ​സ്ഥ​ല​ത്തി​ന്റെ തൊ​ട്ട​ടു​ത്തു​ള്ള ഒ​രു ചെ​റി​യ ഹോ​ട്ട​ലി​ലാ​ണ് ബാ​നു ജോ​ലി​ചെ​യ്യു​ന്ന​ത്. ബാ​നു​വി​ന്റെ ദു​രി​ത​ജീ​വി​താ​നു​ഭ​വ​ങ്ങ​ളു​ടെ ക​ഥ​ക​ളൊ​ക്കെ ഒ​രു പു​ത്ത​ൻ ക​ഥാ​പു​സ്ത​കം വാ​യി​ക്കു​ന്ന ക്ഷ​മ​യോ​ടെ താ​ൽ​പ​ര്യ​ത്തോ​ടെ ഞാ​ൻ കേ​ട്ടി​രു​ന്നി​ട്ടു​ണ്ട്.

അ​ന്ന് ഫെ​ബ്രു​വ​രി 18. ഒ​റ്റ​മു​റി​യി​ൽ ഇ​രു​ന്ന് വ​ല്ലാ​തെ മു​ഷി​ഞ്ഞി​രു​ന്നു. പ​തി​വ് തെ​റ്റി​ക്കേ​ണ്ടെ​ന്ന് ക​രു​തി ഉ​ച്ച​ഭ​ക്ഷ​ണ​ത്തി​നാ​യി താ​ജി​ൽ ചെ​ന്നു. ഹോ​ട്ട​ൽ താ​ജ്. ക​റു​ത്ത ഉ​രു​ണ്ട അ​ക്ഷ​ര​ങ്ങ​ളി​ൽ മ​ഞ്ഞ ബോ​ർ​ഡി​ൽ എ​ഴു​തി​യി​രി​ക്കു​ക​യാ​ണ​ത്. സി​റാ​ജി​ക്ക​യും ഭാ​ര്യ​യും ക​ഴി​ഞ്ഞ ഇ​രു​പ​ത് വ​ർ​ഷ​മാ​യി ന​ട​ത്തു​ന്ന ഹോ​ട്ട​ൽ. അ​ന്നു​മു​ത​ൽ ബാ​നു അ​വ​രു​ടെ ഒ​പ്പ​മു​ണ്ട​ത്രെ. പ​ല​പ്പോ​ഴും അ​വ​ര​വി​ടെ ജോ​ലി​ചെ​യ്യു​മ്പോ​ൾ ഞാ​ൻ ചി​ന്തി​ച്ചി​ട്ടു​ണ്ട് അ​ത്ര​മേ​ൽ ജീ​വി​ത​ത്തി​ന്റെ ച​വ​ർ​പ്പ് കു​ടി​ച്ചി​റ​ക്കി​യി​ട്ടും എ​ങ്ങ​നെ ഇ​വ​ർ​ക്ക് ഇ​ത്ര മ​നോ​ഹ​ര​മാ​യി ചി​രി​ക്കാ​ൻ ക​ഴി​യു​ന്നു​വെ​ന്ന്. അ​വ​ർ അ​നാ​ഥ​യാ​ണ്, എ​ക്കാ​ല​വും. ചെ​റു​പ്പ​ത്തി​ൽ മാ​താ​പി​താ​ക്ക​ൾ ഒ​രു കു​പ്പ​ത്തൊ​ട്ടി​യി​ൽ വ​ലി​ച്ചെ​റി​ഞ്ഞു. വ​ലു​താ​യ​പ്പോ​ൾ ത​ന്നെ വ​ഞ്ചി​ച്ച് ഉ​പേ​ക്ഷി​ച്ച താ​ൻ ഏ​റെ സ്നേ​ഹി​ച്ച ത​ന്റെ സ്നേ​ഹി​ത​ൻ.

****

മൂ​ന്ന്

ബാ​നു ഭ​ക്ഷ​ണം വി​ള​മ്പി​യ​തി​നു​ശേ​ഷം എ​ന്റെ എ​തി​ർ സീ​റ്റി​ൽ വ​ന്നി​രു​ന്നു. ഇ​വി​ടെ വ​ന്നി​ട്ട് ഇ​ത്ര​യും നാ​ളു​ക​ൾ പി​ന്നി​ട്ടി​ട്ടും ഇ​ന്നേ​വ​രെ ഞാ​ൻ ഒ​റ്റ​ക്കി​രു​ന്നേ ക​ഴി​ച്ചി​ട്ടു​ള്ളൂ. ഞാ​ന​ത് ആ​സ്വ​ദി​ച്ച് ക​ഴി​ച്ചു. അ​വ​ർ എ​ന്തൊ​ക്കെ​യോ പ​റ​യു​ന്നു​ണ്ട്. ഞാ​ൻ പു​ഞ്ചി​രി​ച്ചു​കൊ​ണ്ട് ത​ല​യാ​ട്ടി.

എ​ന്റെ മ​ന​സ്സ് കൊ​ളു​ത്തി​വ​ലി​ച്ച​ത് പ​ഴ​യ ഓ​ർ​മ​യി​ലേ​ക്കാ​ണ്. ഞാ​ന​ന്ന് ആ​റി​ൽ പ​ഠി​ക്കു​ന്നു. അ​തൊ​രു പ​രീ​ക്ഷ​ക്കാ​ലം കൂ​ടി​യാ​യി​രു​ന്നു. പ​രീ​ക്ഷ​യു​ടെ ത​ലേ​ദി​വ​സം തു​ട​ങ്ങി​യ വ​യ​റു​വേ​ദ​ന​യു​ടെ അ​വ​സാ​നം ക​ണ്ട​ത് പ​രീ​ക്ഷ ഹാ​ളി​ൽ വെ​ച്ചാ​ണ്. ആ​ദ്യം അ​ടി​വ​യ​റ്റി​ൽ വ​ലി​യൊ​രു പാ​റ​ക്ക​ഷ​ണം കെ​ട്ടി​വെ​ച്ച​തു​പോ​ലെ. അ​തി​ന്റെ ഭാ​രം വ​യ​റി​ൽ തു​ള​ച്ച് ക​യ​റി​യ​പ്പോ​ൾ ഞാ​ൻ ഞെ​രു​ങ്ങി. ഉ​ത്ത​ര​ങ്ങ​ൾ എ​ഴു​തു​ന്ന​ത് തു​ട​ർ​ന്നു. ത​ല ചു​റ്റു​ന്ന​തു​പോ​ലെ. വ​യ​റി​ന​ക​ത്തൊ​രു നീ​രാ​ളി മാം​സ​ത്തെ വ​ലി​ച്ച് കീ​റി ചോ​ര പു​റ​ത്തേ​ക്ക് ചീ​റ്റി. കാ​ലു​ക​ൾ ഇ​റു​ക്കി​പ്പി​ടി​ച്ചു​കൊ​ണ്ട് വ​യ​റി​ൽ കൈ ​അ​മ​ർ​ത്തി​പ്പി​ടി​ച്ച് ഞാ​ൻ ക​ര​ഞ്ഞു. പ​രീ​ക്ഷ ക​ഴി​ഞ്ഞ​പാ​ടെ വീ​ട്ടി​ലേ​ക്ക് ഓ​ടി. ഇ​ട്ട ചു​രി​ദാ​റി​ൽ പ​റ്റി​യ ചോ​ര​ക്ക​റ മ​റ​ക്കാ​ൻ റ​സി​യ അ​വ​ളു​ടെ ക​റു​ത്ത ത​ട്ടം എ​ന്റെ അ​ര​യി​ൽ കെ​ട്ടി​യി​രു​ന്നു. അ​വ​ൾ നേ​ര​ത്തേ​ത​ന്നെ വ​ലി​യ പെ​ണ്ണാ​യ​താ​ണ​ത്രെ.

വീ​ട്ടി​ൽ എ​ത്തി​യ​പ്പോ​ൾ വീ​ടി​ന്റെ പി​ൻ​വാ​തി​ലി​ൻ പ​ടി​യി​ൽ പ​ണി​ക്കാ​ർ​ക്കാ​യി വെ​ച്ചി​രി​ക്കു​ന്ന ചോ​റി​ൻ ക​ല​വും മൊ​ന്ത​യും ക​ണ്ടു. വീ​ട്ടി​ലെ എ​ല്ലാ​വ​രും ജോ​ലി ക​ഴി​ഞ്ഞെ​ത്താ​ൻ ഇ​നി​യും വൈ​കും. ഞാ​ൻ കൈ ​വ​യ​റി​ൽ അ​മ​ർ​ത്തി ത​ല ചാ​യ്ച് ആ ​പ​ടി​യി​ൽ ത​ന്നെ ഇ​രു​ന്നു. ഉ​ച്ച​ഭ​ക്ഷ​ണം ക​ഴി​ക്കാ​നാ​യി പ​ണി​ക്കാ​ർ വ​ന്നു. ത​റ​യി​ൽ ക​ട്ട​പി​ടി​ച്ച് കി​ട​ന്ന ക​റ ക​ണ്ട് കു​മാ​രി​യേ​ട്ട​ത്തി​ക്ക് കാ​ര്യം മ​ന​സ്സി​ലാ​യി​രി​ക്ക​ണം. അ​വ​ർ എ​ന്നെ കു​ളി​മു​റി​യി​ലേ​ക്ക് കൂ​ട്ടി​ക്കൊ​ണ്ടു പോ​യി. മു​ഷി​ഞ്ഞ വ​സ്ത്രം ഒ​രു അ​റ​പ്പും കൂ​ടാ​തെ അ​വ​ർ വൃ​ത്തി​യാ​ക്കു​ന്നു​ണ്ടാ​യി​രു​ന്നു. അ​ത​വ​രു​ടെ തൊ​ഴി​ല​ല്ല. അ​തി​ന​വ​ർ​ക്ക് കൂ​ലി​യും കാ​ണി​ല്ല. പ​ക്ഷേ, സ്നേ​ഹ​ത്തി​ന് ഒ​രു ഭാ​ഷ​യു​ണ്ട​ത്രെ.

സോ​പ്പ് പ​ത​ക​ൾ ചു​വ​പ്പ് നി​റ​ത്തി​ലാ​യി പ​ത​ഞ്ഞ് ത​നി​ക്ക് നേ​രെ തെ​റി​ക്കു​മ്പോ​ഴും അ​വ​രു​ടെ മു​ഖ​ത്ത് നി​സ്സ​ഹാ​യ​ത​യെ​ക്കാ​ൾ മ​റ്റെ​ന്തി​ന്റെ​യോ അം​ഗീ​കാ​ര​മാ​യി​രു​ന്നു. എ​ന്തി​ന്? മ​നു​ഷ്യ​ത്വ​ത്തി​ന്റെ, സ്ത്രീ​ത്വ​ത്തി​ന്റെ ക​ട​മ​യാ​കു​മോ...

***

നാ​ല്

ബാ​നു കൈ ​ക​ഴു​കാ​നാ​യി എ​ഴു​ന്നേ​റ്റു. പു​റ​കെ ഞാ​നും. അ​ന്നൊ​രു​പാ​ട് ഓ​ർ​മ​ക​ൾ വാ​ർ​ത്തെ​ടു​ത്തു. ചി​ല​തെ​ന്നെ ചി​ന്തി​പ്പി​ച്ചു. മ​റ്റു ചി​ല​തെ​ന്നെ ക​ര​യി​പ്പി​ക്കു​ക​യും ചെ​യ്തു.

****

അ​ഞ്ച്

‘‘ബാ​നു... എ​ന്തെ​ങ്കി​ലും പ​റ, ഒ​ന്നും പ​റ​യാ​തെ പോ​ക​രു​ത്’’.

ബാ​നു തി​ര​ച്ചി​ൽ നി​ർ​ത്താ​തെ തു​ട​ർ​ന്നു. ഇ​നി ബാ​നു എ​ന്റെ തോ​ന്ന​ലാ​ണോ. ഞാ​ൻ ക​ണ്ണ് മു​റു​ക്കെ അ​ട​ച്ചു. യാ ​റ​ബ്ബി... ഇ​ന്ന് അ​വ​സാ​ന​ത്തെ നോ​മ്പാ​ണ്. പെ​രു​ന്നാ​ളി​നു​ള്ള എ​ന്റെ കു​പ്പാ​യം പു​തി​യ ര​ണ്ട് വെ​ള്ള​ത്തു​ണി​ക​ളാ​ണെ​ന്ന് ഞാ​ൻ തി​രി​ച്ച​റി​ഞ്ഞ​ത് ബാ​നു തി​ര​ച്ചി​ൽ നി​ർ​ത്തി​യ​പ്പോ​ഴാ​ണ്. ചു​റ്റി​നും ആ​ളു​ക​ൾ അ​പ്പോ​ഴു​മു​ണ്ട്. അ​വ​രൊ​ക്കെ ഇ​ലാ​ഹി​ന് ക​ത്തെ​ഴു​തു​ന്ന​വ​രാ​ണ്. അ​തി​ലാ​രു​ടെ​യോ ക​ണ്ണെ​ന്റെ ക​ത്തി​ൽ ചെ​ന്നു​ട​ക്കി.

‘‘മ​യ്യ​ത്തി​നെ കു​ളി​പ്പി​ക്കാ​ൻ സ​മ​യ​മാ​യി’’

എ​വി​ടെ​ന്നോ ശ​ബ്ദം ഉ​യ​ർ​ന്നു. തൊ​ട്ട​ടു​ത്തു​ള്ള പ​ള്ളി​യി​ൽ നി​സ്കാ​ര​ത്തി​നു​ശേ​ഷം മ​ര​ണ​വാ​ർ​ത്ത അ​റി​യി​ക്കു​മ്പോ​ൾ അ​തി​ലൊ​ന്ന് എ​ന്റേ​ത്. വ​ന്ന​വ​ർ​ക്കി​ട​യി​ൽ എ​ന്റെ പ്രി​യ​പ്പെ​ട്ട​വ​രു​മു​ണ്ടെ​ങ്കി​ലും ഞാ​ൻ നോ​ക്കി​യ​ത് ബാ​നു​വി​ന്റെ ക​ല​ങ്ങി​യ ക​ണ്ണു​ക​ളെ മാ​ത്രം. ആ ​ക​ണ്ണു​ക​ൾ ക​ഥ​പ​റ​ഞ്ഞ് ക​ഴി​ഞ്ഞി​ല്ലാ​യി​രി​ക്ക​ണം.

ഇ​നി മീ​സാ​ന്‍ക​ല്ലി​നു ചോ​ട്ടി​ലെ മ​ണ്ണി​ല്‍ ഞാ​ൻ മ​യ​ങ്ങു​മ്പോ​ൾ അ​വ​ർ ന​ട്ട മൈ​ലാ​ഞ്ചി ചെ​ടി​യു​ടെ മ​ണം പ​ട​ര​ണം... ആ ​പു​ഞ്ചി​രി​പോ​ലെ അ​ത് ചു​റ്റി​നും ഒ​ഴു​ക​ണം.