കോട്ടയം-മെഡിക്കൽകോളജ് റോഡിൽ കൂറ്റൻ തടികൾ

കോട്ടയം: റോഡരികിൽ വെട്ടിയിട്ട മരം യാത്രക്കാർക്ക് അപകട ഭീഷണിയായിട്ട് ഒരുമാസം. കോട്ടയം-മെഡിക്കൽകോളജ് റോഡിൽ ചുങ്കം കവലയിലെ തണൽമരമാണ് വാഹനയാത്രക്കാരെയും കാൽനടക്കാരെയും ഒരുപോലെ ബുദ്ധിമുട്ടിച്ച് പ്രധാനപാതയോട് ചേർന്ന് കിടക്കുന്നത്.

അതിവേഗത്തിലുള്ള ആംബുലൻസുകൾ അടക്കം നൂറുകണക്കിന് വാഹനങ്ങൾ കടന്നുപോകുന്ന വഴിയിലാണ് ഇത്. ചുങ്കം കവലയിലെ കടക്കാരുടെയും പ്രദേശവാസികളുടെയും നിരന്തരമായ പരാതിയെ തുടർന്നാണ് ജൂ​െലെ രണ്ടാം വാരം മരം വെട്ടാൻ നടപടിയായത്.

കുറച്ചുശിഖരങ്ങൾ മാത്രം മുറിച്ചുമാറ്റി വെട്ടുകാർ മടങ്ങി. പൂർണമായും മുറിച്ച് മാറ്റിയില്ലെങ്കിൽ കൂടുതൽ അപകടമുണ്ടാകുമെന്ന പരാതി നഗരസഭയും പി.ഡബ്ല്യു.ഡിയും അവഗണിച്ചിരുന്നു. തുടർന്ന്​ വെട്ടാതെ നിർത്തിയ ശിഖരം കാറ്റിൽ ഒടിഞ്ഞുവീണു. ഇതോടെ ശിഖരങ്ങൾ മുറിച്ച്​ റോഡിൽ തന്നെ കൂട്ടിയിട്ടു.

വളവും വീതികുറവുമുള്ള ഭാഗത്താണ് തടി കൂട്ടിയിട്ടിരിക്കുന്നത്. റോഡരികിലേക്ക് വാഹനങ്ങൾ ചേർത്തോടിക്കേണ്ടിവരുമ്പോൾ, ഇത് ശ്രദ്ധയിൽപ്പെടാതെ പോയാൽ അപകടസാധ്യത ഏറെയാണ്.

ഈ ഭാഗത്ത് കാൽനടക്കാർക്ക് നടന്നുപോകാൻ സ്ഥലമില്ലാതെ വരുന്നതിനാൽ റോഡിൽ കയറുന്നതും അപകടമാവുന്നു. അടിയന്തരമായി തടി മാറ്റാൻ അധികൃതർ നടപടി സ്വീകരിക്കണമെന്നാണ് ആവശ്യം.