മാനസിക വിഭ്രാന്തിയുള്ള രണ്ട് മക്കളുമായി ഷീറ്റ് മറച്ച കൂരയിൽ അബ്​ദുറഹ്മാ​െൻറ ജീവിതം

വട്ടംകുളം: ശക്തമായി കാറ്റടിച്ചാൽ നിലംപൊത്താവുന്ന കൂരയിൽ മാനസിക വിഭ്രാന്തിയുള്ള രണ്ട് മക്കളുമായി ജീവിക്കുന്ന അബ്​ദുറഹ്മാനും കുടുംബവും അധികൃതരുടെ കണ്ണിൽ മുൻഗണന വിഭാഗത്തിൽപെട്ടയാളാണ്.

വട്ടംകുളം ചോലക്കുന്നിൽ കണ്ണയിൽപറമ്പിൽ അബ്​ദുറഹ്മാ​െൻറ ജീവിതം കണ്ടാൽ ആരുടെയും മനസ്സ്​ അലിയുമെങ്കിലും കനിവ് കാട്ടേണ്ട അധികൃതർ ഈ കുടുംബത്തിന് മുന്നിൽ കണ്ണടച്ച് ഇരുട്ടാക്കുകയാണ്.

നാല്​ സെൻറ് സ്ഥലത്ത് ഷീറ്റുകൊണ്ട് മറച്ച കൂരയിലാണ് മാനസികവിഭ്രാന്തി പ്രകടിപ്പിക്കുന്ന രണ്ട് ആൺമക്കളുമായി ഇദ്ദേഹം ദുരിതജീവിതം നയിക്കുന്നത്. ഈ വീട് വാസയോഗ്യമല്ലാത്തതിനാൽ മകളെ പടിഞ്ഞാറങ്ങാടിയിലുള്ള യതീംഖാനയിൽ നിർത്തി പഠിപ്പിക്കുകയാണ്.

മക്കൾ മാനസിക വിഭ്രാന്തിയുള്ളതിനാൽ സമയാസമയങ്ങളിൽ ഭക്ഷണവും മരുന്നും നൽകേണ്ടതിനാൽ ഇദ്ദേഹത്തിന് ജോലിക്ക് പോകാനും കഴിയുന്നില്ല. കുതിരവട്ടം മാ​േനാരോഗ ആശുപത്രിയിലാണ് മക്കൾക്ക് ചികിത്സ നൽകുന്നത്. എല്ലാ മാസവും ഇവിടെയെത്തി ചികിത്സ നൽകണം. മൂത്തമകൻ അബ്​ദുൽസലാമിന് 24ഉം രണ്ടാമത്തെ മകൻ അബ്​ദുൽ ഷെമീറിന് 22 വയസ്സുമാണ്.

ആറുവർഷം മുമ്പ് ആദ്യ ഭാര്യ മരിച്ചതോടെയാണ് ഈ രണ്ടുമക്കളും മാനസിക അസുഖം പ്രകടിപ്പിച്ചുതുടങ്ങിയത്. ആദ്യ ഭാര്യയുടെ വീട്ടുകാർ വാങ്ങിനൽകിയതാണ് നാല്​ സെൻറ് സ്ഥലം. ഓലപ്പുര ചോർ​െന്നാലിച്ചതോടെ പ്രദേശത്തെ സുമനസ്സുകൾ വീടിന് മുകളിൽ ടാർപ്പായ വിരിച്ചുനൽകിയെങ്കിലും അതും നശിച്ച അവസ്ഥയിലാണ്.

ആദ്യ ഭാര്യയുടെ മരണശേഷം അബ്​ദുറഹ്മാൻ മറ്റൊരു വിവാഹം കഴിച്ചെങ്കിലും ഈ വീട് വാസയോഗ്യമല്ലാത്തതിനാലും മക്കൾ മാനസിക അസുഖം പ്രകടിപ്പിക്കുന്നവരായതിനാലും ആ ഭാര്യയും മക്കളും ഇവിടെ വന്ന് താമസിക്കാറില്ല. വീട് നിൽക്കുന്ന നാല് സെൻറ് ഭൂമി പോലും സുമനസ്സുകളുടെ ശ്രമഫലമായി അടുത്തകാലത്താണ് സ്വന്തമായി രജിസ്​റ്റർ ചെയ്ത് കിട്ടിയത്.

ഏത് നിമിഷവും തകർന്നുവീഴാവുന്ന ഓലപ്പുരയിൽ കഴിയുന്ന ഈ കുടുംബത്തിന് കിട്ടിയത് എ.പി.എൽ റേഷൻ കാർഡാണ്. പ്രദേശവാസികൾ നൽകുന്ന സഹായംകൊണ്ടാണ് ഇപ്പോൾ ഇവർ ജീവിക്കുന്നത്. കുടുംബത്തി​െൻറ ദുരവസ്ഥ കാണിച്ച് കലക്ടർക്കും വട്ടംകുളം പഞ്ചായത്ത് സെക്രട്ടറിക്കും അപേക്ഷ നൽകിയിരുന്നു. എന്നാൽ, നടപടിയുണ്ടായില്ല.