മഹാമാരി തിരശ്ശീലയിട്ടപ്പോൾ നാടക സംഘത്തിന്​​ ആശ്രയം കൂൺകൃഷി ​

ഷൊർണൂർ: രാജ്യത്തെ എണ്ണപ്പെട്ട തിയറ്റർ നാടക സമിതികളിലൊന്നായ ഷൊർണൂർ ചുഢുവാലത്തൂരിലെ ജനഭേരി സാംസ്കാരിക നിലയം അതിജീവനത്തിനായി കൃഷിയിലേക്കിറങ്ങി.

ഏറെ പ്രശംസ നേടിയ കുറത്തി, രസ എന്നീ നാടകങ്ങൾക്കുശേഷം കോവിഡി​െൻറ പാശ്ചാത്തലത്തിൽ, നാടക സമിതി അടഞ്ഞുകിടക്കുകയാണ്‌. ഇനി എന്ന് തുറക്കാനാവുന്ന് പ്രതീക്ഷിക്കാനുമാവില്ല. ഈ സാഹചര്യത്തിലാണ് നിലനിൽപിനായി കൃഷിയിലേക്കും അനുബന്ധ തൊഴിലുകളിലേക്കും കലാകാരന്മാർ തിരിഞ്ഞത്.

സംസ്ഥാനത്ത്​ ഇതുവരെയില്ലാത്ത ബട്ടൺ കൂൺ കൃഷിയിലേക്കാണ് കലാകാരന്മാർ ആദ്യം കൈ വെച്ചത്. ഇവിടുത്തെ കാലാവസ്ഥ ബട്ടൺ കൂൺകൃഷിക്ക് യോജിച്ചതല്ല. ഇതിനാൽ സാംസ്കാരിക കേന്ദ്രത്തിന് പിറകിൽ പ്രത്യേകം ഷെഡുണ്ടാക്കി, എയർ കണ്ടീഷണറുപയോഗിച്ച് ശീതീകരിച്ചാണ് കൃഷി ആരംഭിച്ചത്‌.

ആദ്യ വിളവെടുപ്പ് ആഗസ്​റ്റ്​ ഒമ്പതിന്​ നടന്നു. 3000 ബഡ്ഡുകളുള്ള ഒരു യൂനിറ്റിൽ നിന്നാണ് വിപണനത്തിന് തയാറായ കൂൺ ഉൽപാദിപ്പിച്ചത്. പ്രതിദിനം 50 കിലോ കൂൺ ലഭിക്കും. ഇങ്ങിനെ ഒരു യൂനിറ്റിൽ നിന്നും വിളവെടുപ്പ് കാലാവധിയായ 20 ദിവസത്തിനുള്ളിൽ 600 കിലോ ലഭിക്കുമെന്നാണ് പ്രതീക്ഷ.

രണ്ടുമാസത്തിനുള്ളിൽ അഞ്ച്​ യൂനിറ്റ് തയാറാക്കുകയാണ് ലക്ഷ്യം. അതിനാൽ എല്ലാ ദിവസവും മുടങ്ങാതെ കൂൺ കിട്ടും. 200 ഗ്രാമി​െൻറ പാക്കറ്റിന് 60 രൂപയാണ് വില. കലാകാരന്മാർ നേരിട്ട് തന്നെ കടകളിലും മറ്റും എത്തിക്കുന്ന സംവിധാനമാണുള്ളത്.

സുഭിക്ഷ കേരളം പദ്ധതിയിൽ ഉൾപ്പെടുത്തിയ സംരംഭം വിജയപാതയിലെത്തിച്ച് അനുബന്ധമായി മറ്റ് മേഖലകളിലേക്ക് കടക്കാനാണ് പദ്ധതിയെന്ന്​ ജനഭേരി അസി. ഡയറക്ടർ അഭിമന്യു പറഞ്ഞു. ഡൽഹിയിൽ നടക്കുന്ന ഏഷ്യയിലെ ഏറ്റവും വലിയ തിയറ്റർ മഹോത്സവമായ 'ഭാരത് രംഗി'ൽ രണ്ട് തവണ തെരഞ്ഞെടുക്കപ്പെട്ട നാടകം അവതരിപ്പിച്ചിട്ടുണ്ട് ജനഭേരി.

രാജ്യത്തെ പ്രമുഖ സ്​റ്റേജുകളിലും നാടകം അവതരിപ്പിച്ചിട്ടുമുണ്ട്. 15 ലക്ഷം രൂപ ചെലവിൽ നിർമിച്ചവതരിപ്പിച്ച 'കുറത്തി' നാടകം തിയറ്റർ രംഗത്ത് ചരിത്രംകുറിച്ചു. കഥകളിയും സോദാഹരണ ക്ലാസുകളും നാടക കളരിയുമൊക്കെയുള്ള ജനഭേരി പ്രവർത്തകർ അതിജീവന പോരാട്ടത്തിലാണ്, മഹാമാരി മാറി കളിയരങ്ങുകൾ തിരിച്ചുവരുമെന്ന ശുഭപ്രതീക്ഷയോടെ...