സന്തോഷ് ട്രോഫിയിൽ മണിപ്പൂരിനെതിരെ വിജയിച്ച ബംഗാൾ താരങ്ങൾ കളിയിലെ താരമായ ഗോൾ കീപ്പർ പ്രിയന്ത് എ. കുമാറിനെ എടുത്തുയർത്തുന്നു
മലപ്പുറം: സന്തോഷ് ട്രോഫി ഫുട്ബാൾ ചാമ്പ്യൻഷിപ്പിൽ ഉജ്വല പ്രകടനത്തോടെ ഫൈനലിലെത്തിയ കേരളം പെയ്യിച്ചത് ഗോൾമഴ. യോഗ്യത റൗണ്ട് കൂടി ചേർത്ത് എട്ട് മത്സരങ്ങൾ കളിച്ച ആതിഥേയർ 36 തവണയാണ് എതിർ ടീമിന്‍റെ വലയിൽ പന്തെത്തിച്ചത്. വഴങ്ങിയതാവട്ടെ ഏഴെണ്ണം മാത്രം. ഇതിൽ മൂന്നും കഴിഞ്ഞ രാത്രി കർണാടകക്കെതിരെ നടന്ന സെമി ഫൈനൽ മത്സരത്തിലാണ്. ഈ കളിയിൽ അഞ്ച് ഗോളടിച്ച സ്ട്രൈക്കർ ജെസിൻ തോണിക്കര ആകെ ഒമ്പത് തവണ സ്കോർ ചെയ്തു. ഫൈനൽ റൗണ്ടിൽ മാത്രം ആറെണ്ണമടിച്ച് ജെസിൻ ഒന്നാമനാണ്. അഞ്ച് ഗോളുമായി ക്യാപ്റ്റൻ ജിജോ ജോസഫാണ് ഫൈനൽ റൗണ്ടിൽ രണ്ടാമൻ. മൊത്തം മത്സരങ്ങൾ നോക്കിയാൽ നിജോ ഗിൽബർട്ടും അഞ്ചടിച്ചു.
കൊച്ചിയിലാണ് ദക്ഷിണേന്ത്യ യോഗ്യത റൗണ്ട് നടന്നത്. ആദ്യ കളിയിൽ ലക്ഷദ്വീപിനെതിരെ കേരളം എതിരില്ലാത്ത അഞ്ച് ഗോളിന് ജയിച്ചു. പിന്നാലെ അന്തമാനെ 9-0ത്തിനും പുതുച്ചേരിയെ 4-1നും തകർത്തു. ഫൈനൽ റൗണ്ടിൽ രാജസ്ഥാനോട് 5-0ത്തിനും ബംഗാളിനോട് 2-0ത്തിനും പഞ്ചാബിനോട് 2-1നും ജയിച്ചപ്പോൾ മേഘാലയയോട് 2-2ന് സമനില വഴങ്ങി. സെമിയിൽ ജെസിന്‍റെ തേരോട്ടത്തിൽ കർണാടകക്കെതിരെ 7-3 വിജയം. യോഗ്യത റൗണ്ടിൽ അന്തമാനെതിരെ നിജോയും ജെസിനും ഇരട്ട ഗോൾ നേടിയിരുന്നു. ലക്ഷദ്വീപും ഫൈനൽ റൗണ്ടിൽ ബംഗാളും ഓരോ തവണ ജെസിന്‍റെ കാൽച്ചൂടറിഞ്ഞു. ഫൈനൽ റൗണ്ടിൽ രാജസ്ഥാനോട് ഹാട്രിക് നേടിയ ജിജോ പഞ്ചാബിനെതിരെ രണ്ട് ഗോളുമടിച്ചു. യോഗ്യത, ഫൈനൽ റൗണ്ടുകളിലായി അർജുൻ ജയരാജ് നാലും നൗഫൽ മൂന്നും പ്രാവശ്യം സ്കോർ ചെയ്തിട്ടുണ്ട്.
സന്തോഷ് ട്രോഫി ഫൈനല്‍ തിങ്കളാഴ്ച രാത്രി എട്ടിന്
മഞ്ചേരി: സന്തോഷ് ട്രോഫി ഫുട്‌ബാള്‍ ചാമ്പ്യന്‍ഷിപ്പിന്‍റെ ഫൈനല്‍ മത്സരം തിങ്കളാഴ്ച രാത്രി എട്ടിന് നടക്കും. ഫൈനലിനുള്ള ഓഫ്‌ലൈന്‍ കൗണ്ടര്‍ ടിക്കറ്റുകളുടെ വില്‍പന മത്സരദിവസം വൈകീട്ട് നാലിന് ആരംഭിക്കും. തിരക്ക് നിയന്ത്രിക്കാനാണ് ടിക്കറ്റ് വിതരണം നേരത്തേയാക്കുന്നത്. ഓഫ്‌ലൈന്‍ ടിക്കറ്റ് എടുക്കാന്‍ സാധിക്കാത്തവര്‍ക്ക് ഓണ്‍ലൈന്‍ ടിക്കറ്റുകള്‍ ലഭ്യമാണ്. https://santoshtrophy.com/ എന്ന വെബ്‌സൈറ്റ് വഴിയാണ് ഓണ്‍ലൈന്‍ ടിക്കറ്റുകള്‍ വിതരണം ചെയ്യുന്നത്. മത്സരം കാണാനെത്തുന്നവര്‍ 7.30ന് മുമ്പ് സ്റ്റേഡിയത്തില്‍ പ്രവേശിക്കണം.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.