അസംബന്ധ നാടകം

ജനാധിപത്യം പലപ്പോഴും അസംബന്ധ നാടകങ്ങൾക്ക്​ വേദിയാകാറുണ്ട്​. അധികാരത്തിൽ എത്താൻ ഫാഷിസത്തിനും ‘ജനാധിപത്യ’ത്തെ ഉപയോഗിക്കാം എന്ന ‘അസംബന്ധ’ത്തെക്കുറിച്ചല്ല പറയാൻ ഉദ്ദേശിക്കുന്നത്​. ഇപ്പോൾ മഹാരാഷ്​ട്രയിൽ അരങ്ങേറുന്ന രാഷ്​ട്രീയ കുതിരക്കച്ചവടത്തെപ്പറ്റിയാണ്​ പരാമർശം. അവിടത്തെ നടപടികളിലെ മൂല്യത്തകർച്ച നിലവിലെ രാഷ്​ട്രീയത്തെപ്പറ്റി നമ്മിൽ അവമതിപ്പ്​ വളർത്തും.

മഹാരാഷ്​ട്ര എന്നും അധികാര രാഷ്​ട്രീയത്തി​ന്റെ ഒരു മോശം അരീനയാണ്​. മറ്റ്​ പല സംസ്​ഥാനങ്ങളും ഏറിയും കുറഞ്ഞും അതേ അവസ്​ഥയിലാണെന്ന്​ വിസ്​മരിച്ചുകൊണ്ടല്ല ഇൗ വിധി ​പ്രസ്​താവം. അവിടെ എൻ.സി.പി പിളർത്തി അജിത്​ പവാർ ശിവസേന (ഷി​ൻഡെ പക്ഷം)^ബി.ജെ.പി സഖ്യ സർക്കാറി​ന്റെ ഭാഗമായിരിക്കുന്നു. ശരദ്​ പവാറി​ന്റെ അനന്തരവനാണ്​ അജിത്​ പവാർ. ഒരുഎം.പിയും 31 എം.എൽ.എമാരും അജിത്​ പവാറിനൊപ്പമുണ്ടെന്നാണ്​ കരുതുന്നത്​. 40 എം.എൽ.എമാരുടെ പിന്തുണയുണ്ടെന്ന്​ അജിത്​ പവാർ അവകാശപ്പെടുന്നു. അതിനിടെ അജിത്തിനൊപ്പം പോയ മറാത്ത സിനിമാതാരവും എം.പിയുമായ അമുൽ കോലെ വീണ്ടും കളംമാറ്റി ചവിട്ടി പഴയ ലാവണത്തിൽ തിരിച്ചെത്തിയിട്ടുമുണ്ട്​. 70,000 കോടിയുടെ ജലസേചന, മഹാരാഷ്​ട്ര സഹകരണ ബാങ്ക്​​ അഴിമതി കേസുകളിൽ അന്വേഷണം നേരിടുന്നയാളാണ്​ അജിത്​ പവാർ. അജിത്തി​െനാപ്പമുള്ള സുനിൽ തത്​കരെയും അഴിമതി അന്വേഷണം നേരിടുന്നുണ്ട്​. ഇവരെ കേസുകൾ ചൂണ്ടിക്കാട്ടി ബി.ജെ.പി സമ്മർദത്തിലാക്കി തങ്ങളുടെ ചേരിയി​െലത്തി​െച്ചന്നാണ്​ ചില രാഷ്​ട്രീയ നിരീക്ഷകരുടെ അഭി​പ്രായം. അതല്ല, അധികാരമോഹിയായ അജിത്​ പവാർ ഇതും ഇതിലപ്പുറവും ചെയ്യുമെന്ന്​ മറ്റൊരു വാദവുമുണ്ട്​. ചിത്രം​ തെളിയാനിരിക്കുന്നതേയുള്ളൂ. ഏതായാലും ഇപ്പോൾ ഏക്​നാഥ്​^ഷിൻഡെ സർക്കാറിൽ അജിത്​ പവാർ ഉപമുഖ്യമന്ത്രിയായിട്ടുണ്ട്​.

മഹാരാഷ്​ട്രയിൽ ഇതുവ​െര നടന്ന നാടകത്തി​ന്റെ ചുരുക്കം ഇങ്ങനെയാണ്​: 2019 ഒക്ടോബറിൽ 288 അംഗ നിയമസഭയിലേക്ക്​ തെരഞ്ഞെടുപ്പ്​ നടക്കുന്നു. ബി.ജെ.പിയും ശിവസേനയും ഒരുമിച്ച്​ മത്സരിക്കുന്നു. സർക്കാർ രൂപവത്കരിക്കാനുള്ള ആൾബലം അവർക്ക്​ കിട്ടി. പക്ഷേ, തമ്മിൽ തെറ്റി. ബി.ജെ.പിയും ശിവസേനയും രണ്ടു വഴിക്കായി. രാഷ​്​ട്രപതി ഭരണം ഒരുമാസം പിന്നിട്ടപ്പോൾ ബി.ജെ.പി നേതാവ്​ ദേവേന്ദ്ര ഫഡ്​നാവിസ്​ മുഖ്യമന്ത്രിയായി. ഉപമുഖ്യമ​ന്ത്രിയായി അജിത്​ പവാർ. എൻ.സി.പിയെ പിളർത്താൻ ബി.ജെ.പി കഴിയുന്നതെല്ലാം ചെയ്​തു. പക്ഷേ, സർക്കാർ നാലുനാൾക്കകം നിലംപൊത്തി. പിന്നാലെ ശിവസേന, എൻ.സി.പി, കോൺഗ്രസ്​ പാർട്ടികൾ ചേർന്ന്​ മഹാ വികാസ്​ അഘാഡി രൂപവത്കരിച്ച്​ ഭരണത്തിലെത്തി. ശിവസേന നേതാവ്​ ഉദ്ധവ്​ താക്കറെ മുഖ്യമന്ത്രി. ഫഡ്​നാവിസി​ന്റെ കീഴിൽ ഉപമുഖ്യമന്ത്രിയായിരുന്ന അജിത്​ പവാർ ഇൗ മന്ത്രിസഭയിലും ഉപമുഖ്യമന്ത്രിയായി. സർക്കാർ മുന്നോട്ടുപോയി. ഇ.ഡിയും ആദായനികുതി വകുപ്പും എല്ലാം മന്ത്രിസഭയെ വീഴ്​ത്താൻ ആവുന്ന പണിയെടുത്തു. 2022 ജൂൺ 29ന്​ മന്ത്രി ഏക്​നാഥ്​ ഷിൻഡെ 39 എം.എൽ.എമാരുമായി ശിവസേനയെ പിളർത്തി. വിശ്വാസവോട്ട്​ തേടണമെന്ന ഗവർണറുടെ നിർദേശം സുപ്രീംകോടതി സ്​റ്റേ ചെയ്​തില്ല. ഉദ്ധവ്​ സർക്കാർ താഴെ വീണു. ഗവർണറുടെ നടപടി ഭരണഘടനാ വിരുദ്ധമാണെന്ന്​ 11 മാസം കഴിഞ്ഞപ്പോൾ സുപ്രീംകോടതി പറഞ്ഞുവെന്നത്​​ ​​േവറെ കാര്യം.

അധികാരത്തിനുവേണ്ടി ജനപ്രതിനിധികളിൽ നല്ലപങ്കും എന്തു നെറികെട്ട കളിക്കും തയാറാകും എന്നതിന്​ മഹാരാഷ്​ട്ര നല്ല പാഠപുസ്തകമാണ്​. ഇവിടെ തോൽപിക്കപ്പെടുന്നത്​ ജനങ്ങളാണ്​ എന്നതാണ്​ മുഖ്യപ്രശ്​നം. രാജ്യം പൊതുവിലും മതേതരത്വവും ജനാധിപത്യവും പ്രത്യേകിച്ചും വെല്ലുവിളി നേരിടുന്ന ഘട്ടമാണിത്​. ഇവിടെ കഴിയുന്നത്ര ശക്തികൾ ഒന്നിച്ചുനിന്ന്​ ഫാഷിസത്തെ പരാജയപ്പെടുത്തുകയാണ്​ വേണ്ടത്​. അത്തരത്തിൽ ​െഎക്യങ്ങൾ ഉണ്ടാകേണ്ട ഘട്ടത്തിലാണ്​ എൻ.സി.പിയിലെ പിളർപ്പും തിരിച്ചടിയും. ഒന്നുകിൽ ഇൗ കക്ഷികൾക്ക്​ ജനങ്ങളോട്​ പ്രതിബദ്ധതയില്ല. അല്ലെങ്കിൽ ബി.ജെ.പിയുടെ പ്രലോഭനങ്ങളെയും ഭീഷണികളെയും അതിജീവിക്കാൻ കഴിയുന്നില്ല. മഹാരാഷ്​​ട്രയിലെ ഇൗ നാടകം രാജ്യം ഒരു പൊതു തെരഞ്ഞെടുപ്പിനെ നേരിടാൻ അധികം വൈകാതെ പോകുന്ന ഘട്ടത്തിലാണ്​ എന്നത്​ ഒാർക്കണം. വീണ്ടും ജനം തോൽപിക്കപ്പെടാനുള്ള സാധ്യതയാണ്​ ഇൗ കളികൾ കാണിക്കുന്നത്​. അതുണ്ടായാൽ നമ്മുടെ രാജ്യം മരിക്കുമെന്ന ധാരണ ഉണ്ടാകുന്നതാണ്​​ എല്ലാവർക്കും നല്ലത്​.