വേണ്ട, ബുൾഡോസർ രാജ്

രാജ്യത്ത് സമീപകാലത്ത് കണ്ട ഏറ്റവും വലിയ അനീതിയാണ് ബുൾഡോസർ രാജ്. ബി.​ജെ.​പി ഭ​രി​ക്കു​ന്ന സം​സ്ഥാ​ന​ങ്ങ​ളി​ൽ കു​റ്റാ​രോ​പി​ത​രു​ടെ കെ​ട്ടി​ട​ങ്ങ​ളും വീ​ടു​ക​ളും ബു​​ൾ​ഡോ​സ​ർ ഉ​പ​യോ​ഗി​ച്ച് വ്യാ​പ​ക​മാ​യി തകർക്കുന്നത് അടുത്തിടെ പതിവായിരുന്നു. അങ്ങനെ തകർക്കപ്പെട്ടത് മിക്കതും ന്യൂനപക്ഷങ്ങളു​ടെ താമസസ്ഥലവും കെട്ടിടങ്ങളുമായിരുന്നുവെന്നതാണ് വാസ്തവം. കുറ്റാരോപിതരാണ് അല്ലെങ്കിൽ ഭരണകൂടത്തിന് അപ്രിയങ്ങളായ കാര്യങ്ങളിൽ ഏർപ്പെട്ടുവെന്നതിന്റെ പേരിൽ വാസസ്ഥലങ്ങൾ തകർക്കാൻ ഭരണഘടനയിലോ മറ്റ് നിയമവ്യവഹാരങ്ങളിലോ വ്യവസ്ഥയില്ല. പ്രതികാരം നടപ്പാക്കാനല്ല ഭരണകൂടം.

സെപ്റ്റംബർ എട്ടിന്, എന്തായാലും സുപ്രീംകോടതി ബുൾഡോസർ രാജ് വിഷയത്തിൽ ഇടപെട്ടിരിക്കുന്നു. നി​യ​മ​വാ​ഴ്ച​യെ നോ​ക്കു​കു​ത്തി​യാ​ക്കി ‘ബു​ൾ​ഡോ​സ​ർ നീ​തി’ ന​ട​പ്പാ​ക്കു​ന്ന​ത് സു​പ്രീം​കോ​ട​തി ഒ​ക്ടോ​ബ​ർ ഒ​ന്നു​വ​രെ ത​ട​ഞ്ഞു. വ്യ​ക്തി​ക​ളു​ടെ വീ​ടു​ക​ളും കെ​ട്ടി​ട​ങ്ങ​ളും സു​​പ്രീം​കോ​ട​തി​യു​ടെ അ​നു​മ​തി​യി​ല്ലാ​തെ അ​ധി​കൃ​ത​ർ പൊ​ളി​ക്ക​രു​തെ​ന്നാണ് ജ​സ്റ്റി​സ് ബി.​ആ​ർ. ഗ​വാ​യ്, ജ​സ്റ്റി​സ് കെ.​വി. വി​ശ്വ​നാ​ഥ​ൻ എ​ന്നി​വ​ര​ട​ങ്ങി​യ ര​ണ്ടം​ഗ ബെ​ഞ്ചിന്റെ ഇ​ട​ക്കാ​ല ഉ​ത്ത​ര​വ്. പൊതു തെരുവുകൾ, നടപ്പാതകൾ, റെയിൽവേ പാതകൾ, ജലാശയങ്ങൾ എന്നിവയിലെ കൈയേറ്റങ്ങൾക്ക് ഉത്തരവ് ബാധകമല്ല. കേ​സ് ഒ​ക്ടോ​ബ​ർ ഒ​ന്നി​ന് വീ​ണ്ടും പ​രി​ഗ​ണി​ക്കും. ഭ​ര​ണ​ഘ​ട​ന​യു​ടെ 142ാം അ​നു​ച്ഛേ​ദപ്ര​കാ​ര​മു​ള്ള പ്ര​ത്യേ​ക അ​ധി​കാ​ര​ങ്ങ​ൾ ഉ​പ​യോ​ഗി​ച്ചാ​ണ് ഇ​ട​ക്കാ​ല ഉ​ത്ത​ര​വ്.

നി​യ​മ​പ​ര​മാ​യി അ​ധി​കാ​ര​മു​ള്ള​വ​രു​ടെ കൈ​ക​ൾ ഇ​ത്ത​ര​ത്തി​ൽ​ കെ​ട്ടി​യി​ട​രു​തെ​ന്ന് സ​ർ​ക്കാ​റി​നു​വേ​ണ്ടി ഹാ​ജ​രാ​യ സോ​ളി​സി​റ്റ​ർ ജ​ന​റ​ൽ തു​ഷാ​ർ മേ​ത്ത കോടതിയിൽ വാദിച്ചത് തന്നെ നിയമവ്യവസ്ഥയോടുള്ള ഭരണകൂട സമീപനം വ്യക്തമാക്കുന്നു. എന്നാൽ, ഇ​ടി​ച്ചു​നി​ര​ത്ത​ൽ ര​ണ്ടാ​ഴ്ച നി​ർ​ത്തി​വെ​ച്ചാ​ൽ ആ​കാ​ശം ഇ​ടി​ഞ്ഞു​വീ​ഴി​ല്ലെ​ന്ന് തു​ഷാ​ർ മേ​ത്ത​ക്ക് ജ​സ്റ്റി​സ് ഗ​വാ​യ് മ​റു​പ​ടി ന​ൽ​കിയത് ശുഭസൂചകമാണ്. 2022ൽ ​​ഡ​​ൽ​​ഹി​​യി​​ലെ ജ​​ഹാം​​ഗീ​​ർ​​പു​​രി​​യി​​ൽ ക​​ലാ​​പ​​ത്തി​​ൽ പ്ര​​തി​​ചേ​​ർ​​ക്ക​​പ്പെ​​ട്ട​​വ​​രു​​ടെ വീ​​ടു​​ക​​ൾ ഇ​​ടി​​ച്ചു​​നി​​ര​​ത്തി​​യ​​ത് ചോ​ദ്യംചെ​യ്ത് ജം​​ഇ​​യ്യ​തു​ൽ ഉ​​ല​​മാ​​യെ ഹി​​ന്ദ് ഉ​ൾ​പ്പെ​ടെ​യു​ള്ള​വ​ർ ന​ൽ​കി​യ ഹ​ര​ജി പ​രി​ഗ​ണി​ക്ക​വെയാ​ണ് സു​പ്രീം​കോ​ട​തി ന​ട​പ​ടി.

ഉത്തർപ്രദേശിലാണ് ബുൾഡോസർ രാജ് ശരിക്കും അരങ്ങേറിയത്. പൗരത്വ പ്രക്ഷോഭത്തിൽ പ​ങ്കെടുത്തവരുടെ വീടുകൾ പലതും ഇടിച്ചുപൊളിച്ചു. പ്ര​​യാ​​ഗ്​​​രാ​​ജി​​ൽ ജാ​​​വേ​​​ദ്​ മു​​​ഹ​​​മ്മ​​​ദി​​​ന്‍റെ വീട് പൊളിച്ചത് വലിയ വിവാദമുയർത്തിയിരുന്നു. ജാ​​​വേ​​​ദ്​ മു​​​ഹ​​​മ്മ​​​ദി​​​ന്‍റെ വീ​​​ട്​ പൊ​​​ളി​​​ക്കു​​​മെ​​​ന്ന്​ പ്ര​​​ഖ്യാ​​​പി​​​ച്ച്​ ഭ​​​ര​​​ണ​​​കൂ​​​ടം പൊ​​​ളി​​​ച്ച​​​ത്​ അ​​​ദ്ദേ​​​ഹ​​​ത്തി​​​ന്‍റെ വീ​​​ട​​​ായിരുന്നില്ല. ഭാ​​​ര്യ പ​​​ർ​​​വീ​​​ൻ ഫാ​​​ത്തി​​​മ​​​യു​​​ടെ വീ​​​ടാ​​​യിരുന്നുവെന്നത് മറ്റൊരു കാര്യം. അതെന്തായാലും ഭരണകൂടത്തിന് എതിരായി നിലപാട് എടുത്തുവെന്നതി​ന്റെ പേരിലോ കുറ്റങ്ങളിൽ പ്രതിയായതി​ന്റെ പേരിലോ ബു​​ൾഡോസർ രാജ് നടപ്പാക്കുന്നത് അനീതിയാണ്, നിയമ നിഷേധമാണ്, മനുഷ്യാവകാശ-പൗരാവകാശ ലംഘനമാണ്. അത് അനുവദിച്ചുകൂടാ. കോടതി ഇക്കാര്യത്തിൽ ഏറ്റവും നീതിയുക്തമായ വിധി പുറപ്പെടുവിക്കുമെന്ന് തന്നെ പ്രതീക്ഷിക്കാം.