നമ്മൂര എല്ലാരു നമ്മവരു; കോവിഡ്​ കാലത്തെ വിദ്വേഷ പ്രചാരണത്തിനെതിരെ 'ബംഗളൂരു ഫോർ ലവ്'

ബംഗളൂരു: കോവിഡി​െൻറ മഹാമാരിക്കാലത്തും വർഗീയ വിഷം വമിപ്പിക്കുന്ന ബി.ജെ.പി നേതാക്കളുടെ പ്രസ്​താവനക്കെതിരെ ഒാൺലൈനിൽ മാനവ സൗഹാർദ കാമ്പയിന്​ തുടക്കമിട്ടു. 'നമ്മൂര എല്ലാരു നമ്മവരു' (നമ്മുടെ നാട്ടിലെ എല്ലാവരും നമ്മുടേതാണ്​) എന്ന ഹാഷ്​ടാഗിൽ സമൂഹമാധ്യമങ്ങളിൽ ഞായറാഴ്​ച ആരംഭിച്ച കാമ്പയിൻ ഇതിനകം നിരവധിപേർ ഏറ്റെടുത്തു. 'ബംഗളൂരു ഫോർ ലവ്​' എന്ന ഒാൺലൈൻ കൂട്ടായ്​മ തുടക്കമിട്ട കാമ്പയിൻ ട്വിറ്ററിൽ ട്രെൻഡിങ്​ ആയി.

കോവിഡിനെതിരെ ബംഗളൂരു ഒന്നിച്ചാണ്​ പോരാടുന്നതെന്ന്​ നമ്മൾ ഉറക്കെ വിളിച്ചുപറയേണ്ട സമയമാണിതെന്നും ഉത്തരവാദിത്തങ്ങളിൽനിന്ന്​ രക്ഷപ്പെട്ട്​ ജനങ്ങളെ ഭിന്നിപ്പിക്കാൻ രാഷ്​ട്രീയക്കാരെ അനുവദിക്കരുതെന്നും​ കാമ്പയിന്​ തുടക്കമിട്ട്​ 'ബംഗളൂരു ഫോർ ലവ്​' കുറിച്ചു. വിദ്വേഷ പ്രചാരണത്തിനെതിരെയുള്ള മുദ്രാവാക്യങ്ങളുമായി പ്ലക്കാർഡുകളും ചെറു വിഡിയോകളും കവിതയും മറ്റുമായി കാമ്പയിൻ സജീവമാവുകയാണ്​. ​ മത-ജാതി-ഭാഷ-വർഗ വ്യത്യാസമില്ലാതെ എല്ലാ മനുഷ്യരെയും ചേർത്തുപിടിക്കുകയാണെന്ന്​ കോൺഗ്രസ്​ എം.എൽ.എയും ആക്​ടിവിസ്​റ്റുമായ സൗമ്യ റെഡ്​ഡി കുറിച്ചു.

ബംഗളൂരുവിലെ മതസൗഹാർദത്തിന്​ നീണ്ട ചരിത്രമുണ്ടെന്നും ഒരു സമുദായത്തെ മാത്രം ടാർഗറ്റ്​ ചെയ്​തുള്ള ഇത്തരം ജൽപനങ്ങളെ ഒരു തരത്തിലും പിന്തുണക്കാനാവില്ലെന്നും രക്ഷിത്​ എന്നയാ​ൾ കുറിച്ചു. വിദ്വേഷം ഭീരുത്വമാണെന്നും സ്​നേഹമാണ്​ ​ൈധര്യമെന്നും ട്വീറ്റ്​ ചെയ്​ത്​ കാമ്പയിന്​ ​െഎക്യദാർഢ്യവുമായി ഒാൾ ഇന്ത്യ സെൻട്രൽ കൗൺസിൽ ഫോർ ട്രേഡ്​ യൂനിയൻസും രംഗത്തെത്തി. ബി.ജെ.പിയുടെ വർഗീയ വിദ്വേഷത്തിനാണ്​ വാക്​സിൻ നൽകേണ്ടതെന്ന്​ പ്രതികരിച്ച കർണാടക കോൺഗ്രസ്​ അധ്യക്ഷൻ ഡി.കെ. ശിവകുമാർ മുസ്​ലിംകൾ തങ്ങളുടെ സഹോദരന്മാരാണെന്നും ഒന്നിച്ചുജീവിക്കുന്ന തങ്ങൾ ഒന്നിച്ചുതന്നെ ഇവിടെ മരിക്കുമെന്നും വ്യക്തമാക്കി.

ബംഗളൂരുവിലെ കോവിഡ്​ വാർ റൂം കേന്ദ്രീകരിച്ച്​ നടന്ന അഴിമതിയുമായി ബന്ധപ്പെട്ട്​ 17 മുസ്​ലിം ജീവനക്കാരെ മാത്രം ടാർഗറ്റ്​ ചെയ്​ത്​ ബി.ജെ.പി എം.പി തേജസ്വി സൂര്യ, എം.എൽ.എമാരായ ഉദയ്​ ഗരുഡാചർ, സതീഷ്​ റെഡ്​ഡി, രവി സുബ്രഹ്​മണ്യ എന്നിവർ വർഗീയ പ്രചാരണം നടത്തുകയായിരുന്നു. ബംഗളൂരു സൗത്തിലെ കോവിഡ്​ വാർറൂമിൽ എം.എൽ.എമാർക്കൊപ്പം എത്തിയ തേജസ്വി സൂര്യ, മുസ്​ലിം ജീവനക്കാരുടെ പേരെടുത്ത്​ പറഞ്ഞ്​ അവർ അഴിമതിയിൽ പങ്കാളികളാണെന്ന്​ പ്രഖ്യാപിക്കുകയായിരുന്നു. എം.പിയുടെ അമ്മാവനും എം.എൽ.എയുമായ രവി സുബ്രഹ്​മണ്യ 'ഇത്​ മദ്​റസയാണോ അതോ കോർപറേഷനാണോ' എന്നും ചോദിച്ചു. സംഭവം വിവാദമായതോടെ ബി.ജെ.പി നേതാക്കൾക്കെതിരെ രൂക്ഷ വിമർശനമുയർന്നെങ്കിലും തേജസ്വി സൂര്യ എം.പിയെ മുഖ്യമന്ത്രി ബി.എസ്​. യെദിയൂരപ്പ പരസ്യമായി പിന്തുണച്ചു​. എം.പിക്കെതിരെ കോൺഗ്രസ്​ അടക്കമുള്ള രാഷ്​ട്രീയ പാർട്ടികളും ചരിത്രകാരൻ രാമചന്ദ്ര ഗുഹ അടക്കമുള്ളവരും രംഗത്തുവന്നിരുന്നു.