അമ്പലപ്പുഴ: ഓട്ടോറിക്ഷയും സ്കൂട്ടറും കൂട്ടിയിടിച്ച് പോളിടെക്നിക് വിദ്യാർഥി മരിച്ചു. ഹരിപ്പാട് ചെറുതന ആനാരി മാമ്പലശ്ശേരി ജയകുമാറിന്‍റെ മകൻ സഞ്ജുവാണ് (21) മരിച്ചത്. പുന്നപ്ര കാർമൽ പോളിടെക്നിക്കിലെ മൂന്നാംവർഷ ഓട്ടോമൊബൈൽ വിദ്യാർഥിയാണ്.
ദേശീയപാതയിൽ വളഞ്ഞവഴിക്ക് സമീപം ശനിയാഴ്ച രാവിലെ 9.15ഓടെയായിരുന്നു അപകടം. ഈ സമയം മഴ പെയ്തിരുന്നതിനാൽ നിയന്ത്രണം തെറ്റിയാണ് വാഹനങ്ങൾ കൂട്ടിയിടിച്ചത്. തലക്ക് ഗുരുതര പരിക്കേറ്റ സഞ്ജുവിനെ അമ്പലപ്പുഴ പൊലീസും നാട്ടുകാരും ചേർന്ന് മെഡിക്കൽ കോളജ് ആശുപത്രിയിൽ എത്തിച്ചെങ്കിലും രക്ഷിക്കാനായില്ല. മൃതദേഹം പോസ്റ്റ്മോർട്ടത്തിനു ശേഷം കാർമൽ പോളിടെക്‌നിക്കിൽ പൊതുദർശത്തിനു വെച്ചു. സഹപാഠികളും അധ്യാപകരും അന്ത്യോപചാരമർപ്പിച്ചു.
മൃതദേഹം ഹരിപ്പാട് താലൂക്ക് ആശുപത്രി മോർച്ചറിയിലേക്ക് മാറ്റി. കായംകുളം കെ.എസ്.ആർ.ടി.സി ഡിപ്പോയിലെ സ്റ്റേഷൻ മാസ്റ്ററാണ് പിതാവ്. മാതാവ്: സ്മിത (അധ്യാപിക, എസ്.ഡി.വി സ്കൂൾ ആലപ്പുഴ). സഹോദരി: അഞ്ജു. സംസ്കാരം ഞായറാഴ്ച വൈകീട്ട് മൂന്നിന് വീട്ടുവളപ്പിൽ.
