അബ്ദുല്ല മാസ്റ്റർരാമനാട്ടുകര: കേരള മാപ്പിളകല അക്കാദമി ചെയർമാനും എഴുത്തുകാരനും സാമൂഹിക പ്രവർത്തകനും വാഗ്മിയുമായ പി.എച്ച്. അബ്ദുല്ല മാസ്റ്റർ (65) നിര്യാതനായി. അധ്യാപകൻ, സംഘാടകൻ തുടങ്ങി വിവിധ മേഖലകളിൽ വ്യക്തിമുദ്ര പതിപ്പിച്ച മാസ്റ്ററുടെ കാഴ്ചശക്തി ഒരു പതിറ്റാണ്ട് മുമ്പ് പൂർണമായും നഷ്ടപ്പെട്ടിരുന്നു. ഇതിനുശേഷവും സ്വന്തം കർമമണ്ഡലങ്ങളിൽ സജീവമായിരുന്നു ഇദ്ദേഹം. ഇരു വൃക്കകളുടെയും പ്രവർത്തനം നഷ്ടമായതിനെതുടർന്ന്, ഡയാലിസിസിന് വിധേയമായിക്കൊണ്ടിരിക്കെയായിരുന്നു മരണം സംഭവിച്ചത്. ചെയർമാൻ പദവിയിൽ കാൽനൂറ്റാണ്ട് ആഘോഷിക്കാനിരിക്കെയാണ് അദ്ദേഹത്തിന്റെ വിയോഗം. 2001ൽ മാപ്പിള കലാരംഗത്തെ പ്രമുഖരെ ഉൾപ്പെടുത്തി കേരള മാപ്പിള കലാ അക്കാദമി രൂപവത്കരണത്തിന് നേതൃത്വം വഹിച്ചതും ഇദ്ദേഹമായിരുന്നു. നൂറോളം മാപ്പിളപ്പാട്ടുകളുടെയും ദേശഭക്തി ഗാനങ്ങളുടെയും രചയിതാവുമാണ്. സൗദിയിലെ ഹ്രസ്വമായ പ്രവാസകാലത്തും സാമൂഹിക, സാംസ്കാരിക രംഗങ്ങളിൽ സജീവമായിരുന്നു. കാരാട് സി.പി. പോക്കുട്ടി വൈദ്യരുടെ മകൾ ഖൈറുന്നീസയാണ് ഭാര്യ. മക്കൾ: മുഹമ്മദ് അൻവർ, മുഹമ്മദ് ഹുസൈൻ (ഇരുവരും ഷാർജ), മുഹമ്മദ് ഫാറൂഖ്, മുഹമ്മദ് ബിലാൽ, ആയിഷ ബാനു (സംസ്ഥാന വൈസ് പ്രസിഡന്റ്, എം.എസ്.എഫ്). മരുമക്കൾ: അമ്പാട്ട് ഇസ്മയിൽ തുറക്കൽ (ബ്ലോക്ക് പഞ്ചായത്ത് കൊണ്ടോട്ടി), പരേതയായ നസ്റിയ (ചേളാരി), സാബിറ (വടകര), നാഫിയ (കൊളത്തറ), ഫാത്തിമ റിൻഷ (കായലം).