വടക്കഞ്ചേരി: കിഴക്കഞ്ചേരി കുണ്ടുകാട്ടിൽ ബൈക്കുകൾ കൂട്ടിയിടിച്ച് യുവാവ് മരിച്ചു. കിഴക്കഞ്ചേരി നൈനാങ്കാട് മദീന ഹൗസിൽ ഹംസയുടെ മകൻ ഷാജഹാനാണ് (42) മരിച്ചത്. ഡി.വൈ.എഫ്.ഐ നൈനാങ്കാട് യൂനിറ്റ് പ്രസിഡന്റാണ്. ഷാജഹാനോടൊപ്പം ബൈക്കിൽ സഞ്ചരിച്ച നൈനാങ്കാട് സതീഷ് (43), രണ്ടാമത്തെ ബൈക്കിലെ യാത്രക്കാരായ കിഴക്കഞ്ചേരി മമ്പാട് വിപിൻ (24), തിരുവറ ശ്രീഗോവിന്ദ് (24) എന്നിവർക്ക് പരിക്കേറ്റു. സതീഷ് തൃശൂർ മെഡിക്കൽ കോളജ് ആശുപത്രിയിലും മറ്റുള്ളവർ ജില്ല ആശുപത്രിയിലും ചികിത്സയിലാണ്.വ്യാഴാഴ്ച രാത്രി പതിനൊന്നോടെ കുണ്ടുകാട് ഇസാഫ് ബാങ്കിന് മുൻവശത്തായിരുന്നു അപകടം. ഉടൻ നാട്ടുകാർ ചേർന്ന് ഇവരെ പാലക്കാട് ജില്ല ആശുപത്രിയിൽ എത്തിച്ചെങ്കിലും മരിച്ചു. റോഡിൽ തലയടിച്ച് വീണതാണ് മരണകാരണമെന്ന് പൊലീസ് പറഞ്ഞു. വടക്കഞ്ചേരി പൊലീസ് കേസെടുത്തു. പോസ്റ്റ്മോർട്ടത്തിന് ശേഷം മമ്പാട് ജുമാമസ്ജിദ് ഖബർസ്ഥാനിൽ ഖബറടക്കി.ഷെജിതയാണ് ഷാജഹാന്റെ ഭാര്യ. മക്കൾ: ഷിഫാൻ, ഷാഫി, ഷിൻസിന. മാതാവ്: കുഞ്ഞുമ്മാൾ. സഹോദരങ്ങൾ: സലീന, അഷ്റഫ്, ഹസീന, ഷെബീന, ഷക്കീന, ഷാനവാസ്, ഷാജിത, സജീന, ശിഹാബുദ്ദീൻ.
