കൽപകഞ്ചേരി: കടുങ്ങാത്തുകുണ്ടിൽ സ്കൂട്ടറിലിടിച്ച് ലോറിക്കടിയിലേക്ക് തെറിച്ചുവീണ ബുള്ളറ്റ് യാത്രികന് ദാരുണാന്ത്യം.
കുറുക്കോൾ അഞ്ചാംമൈൽ സ്വദേശി നീർക്കാട്ടിൽ നാസറിന്റെ മകൻ ഷാഹിൽ (21) ആണ് മരിച്ചത്. കടുങ്ങാത്തുകുണ്ട്-കുറുക റോഡിലെ ഈങ്ങേങ്ങൽ പടിയിൽ തിങ്കളാഴ്ച ഉച്ചക്കാണ് അപകടം.
വളാഞ്ചേരി മജ്‌ലിസ് ആർട്‌സ് ആൻഡ് സയൻസ് കോളജിൽ ബിരുദ വിദ്യാർഥിയായ ഷാഹിൽ സഞ്ചരിച്ച ബുള്ളറ്റ് എതിർ ദിശയിൽ വന്ന സ്കൂട്ടറിലിടിച്ച് ലോറിക്കടിയിലേക്ക് തെറിച്ചുവീഴുകയായിരുന്നു.
യുവാവ് കുടുങ്ങിയത് അറിയാതെ മീറ്ററുകറോളം ലോറി മുന്നോട്ട് നീങ്ങി. നാട്ടുകാർ കോട്ടക്കലിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
ബൈക്കിൽ കൂടെയുണ്ടായിരുന്ന മറ്റൊരു യുവാവും സ്കൂട്ടർ യാത്രികരും ചികിത്സയിലാണ്. മാതാവ്: ആയിഷ. സഹോദരൻ: ഷഹൽ. ഖബറടക്കം ചൊവ്വാഴ്ച രാവിലെ 11ന് വളവന്നൂർ പഴയ ജുമാ മസ്ജിദ് ഖബർസ്ഥാനിൽ.
